കണ്മഷി

By sulu / December 15, 2020

ഞാൻ കണ്മഷി.അണിയുന്നവരുടെ യുക്തിയും ഭാവനയും അനുസരിച്ചു വ്യത്യസ്തഭാവങ്ങൾ ആവാഹിക്കുന്നവൾ……..
എരിയുന്ന നിലവിളക്കിന്റെ മുഴുവൻ ചൂടും ഏറ്റുവാങ്ങി,ഒടുവിൽ എണ്ണമെഴുക്കിന്റെ സ്നിഗ്ധതയിൽ അലിഞ്ഞുചേരുമ്പോൾ എന്റെ മനസ്സിൽ ഉരുത്തിരിഞ്ഞ ഒരു സ്വപ്നം
ഉണ്ടായിരുന്നു…….അവളുടെ കണ്ണുകളുടെ അഗാധതയിൽ ഒളിച്ചുകളിക്കുക!
പ്രണയിക്കുമ്പോൾ ഒരു വെള്ളാമ്പൽ പൂവുപോലെ കൂമ്പിപ്പോകുന്ന ആ കണ്ണുകളിൽ ആലസ്യത്തോടെ ഞാൻ മയങ്ങിക്കിടന്നു…..
കോപിക്കുമ്പോൾ കനലുകൾ എരിയുന്ന കണ്ണുകളുടെ തീഷ്ണത എന്നെ പൊള്ളിച്ചെങ്കിലും
അതെനിക്കൊരു ലഹരി ആയിരുന്നു…….
ചിരിക്കുമ്പോൾ ആ കണ്ണുകളിലെ നക്ഷത്ര കുരുന്നുകൾക്കൊപ്പം ഞാനും തുള്ളിക്കളിച്ചു….
കരയുമ്പോൾ വജ്രശോഭ വിതറുന്ന നീര്തുള്ളികളേന്തിയ അവളുടെ മിഴികളിൽ
ഒഴുകിപ്പോകാതെ ഞാൻ ഒട്ടിപ്പിടിച്ചിരുന്നു……
കുറുമ്പ് നിറയുമ്പോൾ ആ നയനങ്ങളുടെ പീലിത്തിളക്കത്തിൽ ഞാൻ ചഞ്ചലചിത്തയായി
ഒളിച്ചുകളിച്ചു……..
എന്റെ ജന്മസാഫല്യം ഇവിടെയാണ്‌…..ഈ കരിമിഴികളിൽ…..കരിമിഴികളിൽ മാത്രം!!!

****************************